Əfqanıstanın şimalında, Məzari-Şərif şəhərinin mədəniyyət mərkəzində terror aktı baş verib. Törədilən partlayış nəticəsində azı 4 nəfər ölüb, 16 nəfər yaralanıb.
Bugun.tv xəbər verir ki, bu barədə “Əl-Cəzirə” telekanalı məlumat yayıb.
Bildirilir ki, partlayış jurnalistlərin təntənəli toplantıda iştirak etməli olduğu Tabyan Mədəniyyət Mərkəzində törədilib. Konfransda müxbirlər, din xadimləri və yerli rəsmilər iştirak ediblər.
Partlayış Bakı vaxtı ilə saat 10:30-da baş verib. Hadisə yerinə Taliban təhlükəsizlik qüvvələri gəlib.
Xatırladaq ki, ötən gün Bəlx vilayətinin administrasiyasının ofisində terror aktı törədilib. Əl-Ərəbiyyə telekanalının məlumatına görə, partlayış biri qubernator olmaqla, 3 nəfərin həyatına son qoyub.