Bugun.tv xəbər verir ki, Goranboy rayon sakini, 2-ci Qarabağ savaşının iştirakçısı Fuad Həsənov rastlaşdığı problemlə bağlı redaksiyamıza müraciət edib. O, əlillik pensiyasının kəsilməsindən şikayətçidir.
“2016-ci ilin avqust-sentyabr aylarından könülü olaraq müddətdən artiq hərbi qulluqçu kimi ”N” saylı hərbi hissədə xidmətə başlamışam. 2020-ci ildə, sentyabrin 27-si Cənab Prezidentintimizin verdiyi döyüş əmrini yerinə yetirmək üçün müharibədə iştirak etmişəm. Ancaq sentyabr ayının 30-da düşmən tərəfindən atılan mərmi nəticəsində ayağımdan yaralandım. Həmin an özümdə olmadığım üçün iş yoldaşlarım məni xəstəxanaya çatdırdı. 2021-ci ilin aprel-may ayında tibb müəssisəsində müalicə olunmuşam. İyun ayında isə Əmək və Əhalinin Sosial Müdafiəsi Nazirliyi tərəfindən 3-cü qrup əlillik almışam. Ancaq indi mənə verilən əlillik kəsilib”.
Qazi F.Həsənov deyir ki, ötən ilin noyabr ayında da həkim müayinəsində olub və əlilliyi kəsilməyib. Bir il tamam olmamış yenidən onu yoxlanış üçün Əlillərin Bərpa Mərkəzinə çağırıblar. Bildiriblər ki, artıq ona əlillik düşmür.
O, Bugun.tv-nin əməkdaşlarına müsahibəsində ağrılarının ona əziyyət verdiyini, övladlarına, ailəsinə baxa biləcək fiziki durumda olmadığını söyləyib. “Bu ayaqla mən heç yerdə işləyə bilmirəm. Mən əlaqədar qurumlardan artıq dərəcədə xahiş edirəm, əillik dərəcəm bərpa olunsun və yenidən pensiya ala bilim”, – müharibə veteranı əlavə edib.
Mövzuya yenidən qayıdacağıq.
Müxbir:Arzu İbrahimova