“Ermənistan Prezidenti Vaaqn Xaçaturyanın Sünikdə səsləndirdiyi fikirlər əslində regionda Azərbaycan Prezidenti cənab İlham Əliyevin yaratdığı yeni geosiyasi reallığın Ermənistan tərəfindən tədricən qəbul edilməsinin bariz nümunəsidir. Bu gün Ermənistan rəhbərliyi anlayır ki, 43 kilometrlik Zəngəzur dəhlizi yalnız Azərbaycan üçün deyil, elə Ermənistanın özü üçün də iqtisadi inkişafın, regional inteqrasiyanın və təhlükəsizliyin açarıdır”.
Bugun.tv– xəbər verir ki, bu barədə şərhi Milli Məclisin deputatı Vasif Qafarov verib.
Millət vəkili həmçinin qeyd edib ki, 2020-ci ilin 10 noyabr Bəyanatının 9-cu maddəsində öz əksini tapan bu dəhliz məsələsi Azərbaycanın diplomatik və siyasi gücü nəticəsində beynəlxalq gündəliyə daşınıb və geniş müzakirəyə çıxarılıb. Prezident İlham Əliyevin prinsipial, ardıcıl və uzaqgörən siyasəti sayəsində regionda yeni bir siyasi və iqtisadi düzən formalaşır. Bu düzəndə artıq Ermənistan da əvvəlki kimi inkar və destruktiv mövqelərini saxlaya bilmir – əksinə, Zəngəzur dəhlizini “gələcəyə açılan qapı” kimi təqdim etmək məcburiyyətində qalır.
Prezident İlham Əliyevin liderliyi və siyasi iradəsi sayəsində Azərbaycan yalnız öz ərazi bütövlüyünü bərpa etməklə kifayətlənmədi, həm də regional kommunikasiya və əməkdaşlıq gündəliyini formalaşdırdı. Məhz bu güclü liderliyin nəticəsidir ki, bu gün Ermənistan rəhbərliyi Azərbaycanın müəyyən etdiyi istiqamətdə danışmağa başlayır.
Əgər Ermənistan doğrudan da sülh istəyirsə, bu niyyətini real addımlarla sübut etməlidir. Yalnız bəyanatlar yox, konkret siyasi qərarlar və hüquqi öhdəliklər əsasında regionda sabitlik mümkün olacaq. Azərbaycanın maraqları isə aydındır: sülh, ərazi bütövlüyünə və suverenliyə hörmət, regional əməkdaşlıq və Türk dünyasını birləşdirəcək Zəngəzur dəhlizinin tam şəkildə açılması.
Ermənistanın mövcud reallığı qəbul etməsi regionda Azərbaycanın siyasi, iqtisadi və diplomatik liderliyinin təsdiqidir. Prezident İlham Əliyevin güclü dövlətçilik strategiyası təkcə Azərbaycanın deyil, bütövlükdə Cənubi Qafqazın gələcəyini formalaşdırır. Bu reallıqla barışmaq Ermənistan üçün də yeganə rasional seçimdir”.