Xarici mənbələrdə yayımlanan məlumatlara görə, 2026 FIFA Dünya Kuboku futbol tarixində bir sıra mühüm dəyişikliklərlə yadda qalacaq. Bu turnir ilk dəfə olaraq üç ölkənin — ABŞ, Kanada və Meksikanın birgə ev sahibliyi ilə keçiriləcək. Mütəxəssislər bunun Dünya Kuboku tarixində ən genişmiqyaslı turnir olacağını bildirirlər.
Ən böyük yeniliklərdən biri iştirakçı komandaların sayının 32-dən 48-ə yüksəldilməsidir. Bu dəyişiklik nəticəsində turnirdə ümumilikdə 104 oyun keçiriləcək ki, bu da əvvəlki Dünya Kubokları ilə müqayisədə xeyli çoxdur. FIFA-nın açıqlamasına görə, bu addım daha çox ölkəyə dünya səviyyəsində futbol təcrübəsi qazanmaq imkanı yaratmaq məqsədi daşıyır.
Lakin yeniliklər birmənalı qarşılanmayıb. Bəzi futbol mütəxəssisləri və azarkeşlər oyun sayının artmasının futbolçuların fiziki yüklənməsini artıracağını və matçların keyfiyyətinə mənfi təsir göstərə biləcəyini düşünür. Digər tərəfdən, az tanınan milli komandalar üçün bu format tarixi fürsət hesab olunur.
Turnirin ABŞ-da keçiriləcək final mərhələsinin rekord sayda tamaşaçı və kommersiya gəliri gətirəcəyi proqnozlaşdırılır. 2026 Dünya Kuboku artıq indidən futbol tarixində dönüş nöqtəsi kimi qiymətləndirilir.
Mənbə: Vijesti.me