Bugun.tv xəbər verir ki, martın 21-i dünyada daun sindromlu şəxslərin günü kimi qeyd olunur.
Bu gün Heydər Əliyev fondunun təşkilatçılığı ilə təsis olunan Qayğı Sağlam Nəsil Naminə İctimai Birliyinin nəzdində Daun sindromlu şəxslərin reabilitasiya mərkəzi yerləşir. Direktor Natella Həsənovanın sözlərinə görə, artıq 8 ildir ki, ölkədə sırf bu uşaqlar üçün yeganə ödənişsiz mərkəz kimi fəaliyyət göstərirlər. “Mərkəzimiz 5 yaşından yuxarı bütün daun sindromlu şəxslərə açıqdır. Yaş məhdudiyyəti yoxdur. Burada 5 yaşından 30 yaşa kimi şəxslər var. Mərkəz 2 növbəli – səhər və günorta fəaliyyət göstərir. Söhbət valdeyni olan şəxslərdən, uşaqlardan gedir. Daunlar burada qidalanırlar, onlarla reabilitasiya işi aparılır. Pediatrlar, həkimlər, stomatoloq və digər xidmətlər də mövcuddur. Bununla yanaşı onların təhsilinə vaxt ayrılır. Logaped, psixoloqla yanaşı pedaqoqlar da işləyir, onların nitqi üzərində çalışırlar”.
Reablitasiya mərkəzində daun sindromlu şəxslərin əqli inkişafı ilə bağlı məntiqi tapşırıqlar verilir, eyni zamanda onlara incəsənətin müxtəlif sahələri aşılanır. “Daun sindromlu uşaqlarda incəsənətə xüsusilə maraq var. Onlar rəqslə məşğul olurlar, rəsm çəkməyi sevirlər. Ümumilikdə, belə şəxslər incəsənətdə xüsusilə istedadlı olurlar. 8 il ərzində əsas istiqamətimiz uşaqların reabilitasiyası və sağlam həyata inteqrasiyasını təmin etməkdən ibarət olub. Bununla yanaşı onlar mərkəzdən kənar fəaliyyətlərə də cəlb olunurlar. Ekskursiyalara, müxtəlif rayonlara gedirlər, şənliklərə qatılırlar, tələbələrlə, tanınmış şəxslərlə görüşlər və konsert proqramları təşkil edirik. Qayğı Sağlam Nəsil Naminə İctimai Birlik olaraq onların sosiallaşması üçün bacardığımız qədər müxtəlif fəaliyyətlər təşkil etməyə çalışırıq”.
N.Həsənovanın sözlərinə görə, hazırda mərkəzdə 300-ə yaxın daun sindromlu şəxs qeydiyyatdadır. Bu say günü-gündən artmaqdadır. Hər həftə yeni uşaqlar gəlir.
“Bizdə xüsusi sensor otağı, üzgüçülük hovuzu da var. Heydər Əliyev fondu daun sindromlu şəxslərin inkişafının hər istiqamətini nəzərə alan bir mərkəz təsis edib. Belə qurumlar əksər ölkələrdə belə yoxdur. Bu baxımdan düşünürəm ki, biz şanslıyıq. Bu illər ərzində bir çox flashmoblar təşkil etmişik. Nəticədə cəmiyyət içərisində daun sindromlu şəxsləri barmaqla göstərən və onları görüb təəccüblənən insanların sayı xeyli azalıb. Eyni zamanda belə övladı olub, onları evdə gizlədən valideynlərin də sayında azalma var. Artıq daun sindromlu şəxslər cəmiyyətin bir parçası kimi qəbul olunmağa başlayıblar”,- mərkəzin direktoru əlavə edib.
Müxbir: Qaytən Qasımzadə