31 dekabr tarixində Azərbaycan Respublikasında və dünyanın müxtəlif ölkələrində yaşayan soydaşlarımız Dünya Azərbaycanlılarının Həmrəyliyi Gününü qeyd edirlər.
Bu əlamətdar gün bütün dünya azərbaycanlılarının milli birlik, həmrəylik və vətənə bağlılıq ideyası ətrafında birləşməsini simvolizə edir. Həmrəyliyin rəmzinə çevrilmiş bu tarix milli kimliyimizin və diaspor gücümüzün təcəssümüdür.
Dünya Azərbaycanlılarının Həmrəyliyi Gününün əsası 1989-cu il dekabrın 31-də Araz çayı boyunca baş verən tarixi hadisələrdən sonra qoyulub. 1991-ci ildə Ümummilli Lider Heydər Əliyevin təşəbbüsü ilə bu tarix rəsmi bayram günü kimi təsdiqlənib. Həmin gündən etibarən 31 dekabr azərbaycanlıların milli həmrəyliyinin rəsmi təcəssümünə çevrilib.
Bu gün xarici ölkələrdə fəaliyyət göstərən Azərbaycan diaspor təşkilatları, ictimai birliklər və icmalar tərəfindən müxtəlif tədbirlər, konfranslar və mədəni proqramlar təşkil olunur. Məqsəd Azərbaycan həqiqətlərinin beynəlxalq ictimaiyyətə çatdırılması, milli dəyərlərin qorunması və soydaşlarımız arasında əlaqələrin daha da möhkəmləndirilməsidir.
Bugun.tv olaraq biz də, Dünya Azərbaycanlılarının Həmrəyliyi Günü- xalqımızın gücünü, birliyini və gələcəyə inamını ifadə edən mühüm tarixi təbrik edirik. Bu əlamətdar gün münasibətilə dünyanın harasında yaşamasından asılı olmayaraq bütün azərbaycanlılara birlik, sülh və firavanlıq arzulayırıq.