Rusiya Xarici İşlər naziri Sergey Lavrov TASS agentliyinə verdiyi müsahibədə bir daha bəyan etdi ki, Moskva Tayvanın hər hansı formada müstəqillik iddialarını dəstəkləmir və adanı Çinin ayrılmaz hissəsi kimi qiymətləndirir. Lavrov qeyd edib ki, bu mövqe Rusiya–Çin münasibətlərinin əsas siyasi xəttidir və Pekinin suverenlik hüquqlarını müdafiə etdiklərini təkrar vurğulayıb.
Lavrov həmçinin Tayvan boğazında gərginliyin artması halında Rusiyanın Çin tərəfini tutacağını bildirib və bu baxımdan iki ölkə arasında 2001-ci ildə imzalanmış “Mehriban qonşuluq, dostluq və əməkdaşlıq haqqında” müqavilənin əsas rol oynadığını vurğulayıb. Onun sözlərinə görə, bu sənəd dövlət birliyinin və ərazi bütövlüyünün qorunmasında qarşılıqlı dəstəyi nəzərdə tutur.
Bundan başqa, Lavrov regiondakı təhlükəsizliklə bağlı Yaponiya ilə əlaqəli narahatlıqlarını da ifadə edib və ABŞ-Yaponiya münasibətlərinə toxunaraq, bu ölkələrin hərbi sahədə aparılan siyasətlərinin Rusiya üçün ciddi narahatlıq yaratdığını bildirib. Bu mesajlar, Asiya-Sakit okean regionunda artan geosiyasi gərginlik fonunda verilmişdir.
Mənbə: TASS