Alimlər insan beynində bədənə aidlik hissini yaradan xüsusi bir ritmi müəyyən ediblər. Yeni araşdırmaya görə, beynin alfa dalğaları insanın öz bədənini “özününkü” kimi hiss etməsində əsas rol oynayır. Bu dalğalar görmə və toxunma kimi hisslər arasında uyğunluğu təmin edərək, bədənin beyində necə qavranıldığını formalaşdırır.
Tədqiqat zamanı iştirakçılara virtual reallıq mühitində müxtəlif vizual və fiziki stimullar verilib. Nəticələr göstərib ki, alfa dalğalarının sürəti artdıqca beynin sensor məlumatları birləşdirmə qabiliyyəti də güclənir. Bu isə insanın öz bədəni ilə əlaqəsini daha real və güclü hiss etməsinə səbəb olur.
Mütəxəssislər bildirirlər ki, bu kəşf protez texnologiyaları, neyrorehabilitasiya və virtual reallıq sahəsində böyük irəliləyişlərə yol aça bilər. Xüsusilə amputasiya keçirmiş şəxslərin protezləri daha “canlı” hiss etməsi üçün bu mexanizmin tətbiqi gələcəkdə mümkün ola bilər.
Mənbə: ScienceDaily