Amerikanın GRU Space startapı Ayda inşa ediləcək ilk otel üçün yerlərin bronunu elan edib.
Layihə təkcə varlı turistlər üçün deyil, kosmosun məskunlaşdırılmasına doğru atılan ilk addım kimi təqdim olunur. Dörd qonaq üçün nəzərdə tutulan ilk otelin 2032-ci ildə istifadəyə verilməsi planlaşdırılır.
Şirkət ilkin mərhələdə Ay turlarında iştirak üçün prioritet hüquq verən bron sistemi açıb. Depozit məbləği 250 min ilə 1 milyon dollar arasında dəyişir, konkret uçuş tarixləri isə hələ açıqlanmayıb.
Otellər Ayın yerli torpağından hazırlanacaq “ay kərpicləri” ilə tikiləcək, bu da materialların Yer kürəsindən daşınmasına ehtiyacı azaldacaq. Memarlıq üslubu San-Fransiskodakı İncəsənət Sarayına bənzədiləcək.
Layihənin qurucusu, Berkli Kaliforniya Universitetinin məzunu mühəndis Skayler Çandır. Startap artıq investisiya alıb və Y Combinator akseleratoruna qəbul olunub. İlk sınaq missiyası 2029-cu ilə planlaşdırılır, bu çərçivədə Ayda şişirdilə bilən modullar, tikinti materialları və həyat təminatı sistemləri test ediləcək.
GRU Space gələcəkdə Ay otelini yalnız turizm obyekti deyil, uzunmüddətli kosmik yaşayış üçün infrastrukturun bir hissəsi kimi görür. Bu yanaşma Ayın və sonrakı mərhələdə Marsın mənimsənilməsinə yol aça bilər.
Mənbə: mail.ru