İqtisadçı deputat Vüqar Bayramov öz sosial media hesabında yanvar ayı üçün pensiya artımları ilə bağlı izahat verib.
Deputat bildirib ki, “Əmək pensiyaları haqqında” qanuna əsasən, əmək pensiyalarının indeksləşdirilərək artırılması hər il yanvar ayına da şamil olunur və bu ayın pensiyaları tam ödənilib.
Vüqar Bayramov qeyd edib ki, artımların dərhal verilməməsi qanunvericiliklə bağlıdır. Mövcud qaydalara əsasən, pensiyalar hər il yanvar ayında əvvəlki ilin orta aylıq əmək haqqı artım faizinə uyğun indeksasiya olunur. 2025-ci ilin ilk 11 ayının yekunlarına əsasən, ölkə üzrə orta aylıq əmək haqqı 9.3 faiz artıb, illik göstəricinin isə 9.2 faiz olması gözlənilir. Dəqiq rəsmi faiz göstəricisi isə Dövlət Statistika Komitəsi tərəfindən fevral ayının əvvəllərində elan olunacaq.
Deputat vurğulayıb ki, pensiya artımları yanvarın 1-dən hesablanacaq, amma ödənişlər fevral ayında yanvar və fevral artımları birlikdə veriləcək.
İndeksləşdirmə bütün növ əmək pensiyalarına şamil olunur: yaşa görə, əlilliyə görə və ailə başçısını itirməyə görə əmək pensiyaları. Bu səbəbdən vətəndaşlar pensiya növündən asılı olmayaraq artımı fevral ayında ala biləcəklər.
Vüqar Bayramovun açıqlamasında həmçinin qeyd olunub ki, bu addım pensiyaçıların maliyyə planlamasında şəffaflığı təmin edir və qanunvericiliyə tam uyğundur.