Bugun.tv xəbər verir ki, Milli Məclisin deputatı Ceyhun Məmmədov Ramazan ayı və oruc ibadətinin hikməti ilə bağlı sosial media hesabında paylaşım edib.
Deputat bildirib ki, İslamın vacib ibadətlərindən biri olan orucun əsas məqsədi insanı mənəvi baxımdan saflaşdırmaq, mərhəmət, səbir və dözümlülük kimi dəyərləri gücləndirməkdir. Onun sözlərinə görə, oruc insanı günah əməllərdən çəkindirir və Qurani-Kərimdə bu ibadətin insanları təqvaya, yəni günahlardan uzaq olmağa yönəltdiyi qeyd olunur.
Ceyhun Məmmədov paylaşımında həmçinin vurğulayıb ki, oruc ibadəti yalnız İslamda deyil, digər dinlərdə də mövcud olub. O qeyd edib ki, Yəhudilik və Xristianlıqda da oruc ibadətinə dair nümunələr var və müqəddəs kitablarda peyğəmbərlərin oruc tutması ilə bağlı məlumatlar yer alır.
Deputat xatırladıb ki, Ramazan ayı digər aylardan iki əsas xüsusiyyəti ilə seçilir: Qurani-Kərim məhz bu ayda nazil olub və müsəlmanlara oruc tutmaq bu ayda vacib buyurulub. O əlavə edib ki, İslam alimləri orucun vacib edilməsini Allaha ibadət, nəfsin tərbiyəsi, səbrin möhkəmləndirilməsi və sosial həmrəylik kimi amillərlə əlaqələndirirlər.
Deputatın sözlərinə görə, oruc insanlarda ehtiyaclılara qarşı mərhəmət hissini artırır, imkanlı şəxslərin imkansız insanların yaşadığı çətinlikləri daha yaxşı anlamasına şərait yaradır. Eyni zamanda, Ramazan ayı insanın nemətlərə görə şükür etməsini və mənəvi zənginləşməsini təmin edən müqəddəs bir dövr kimi qiymətləndirilir.
Ceyhun Məmmədov qeyd edib ki, orucun sağlamlığa da müsbət təsirləri var və mütəxəssislər bu ibadətin orqanizmin dincəlməsi baxımından faydalı olduğunu bildirirlər.
Paylaşımının sonunda deputat bütün müsəlmanları Ramazan ayının fəzilətlərindən düzgün yararlanmağa çağıraraq, duaların və orucların qəbul olunmasını arzulayıb.
