ABŞ-də aparılan yeni araşdırma göstərib ki, turş albalı şirəsi yuxu problemlərindən əziyyət çəkən yaşlı insanlarda yuxunun keyfiyyətini yaxşılaşdıra bilər.
Məlumata görə, tədqiqat Harvard Medical School və Hebrew SeniorLife Yaşlanma Araşdırmaları İnstitutunun alimləri tərəfindən aparılıb. Araşdırmanın nəticələri Nutrients jurnalında dərc olunub.
Tədqiqatçılar bildiriblər ki, turş albalı şirəsinin müntəzəm istifadəsi yuxu pozuntusu yaşayan yaşlı insanlarda yuxunun müddətinin artması ilə əlaqəlidir. Əvvəlki pilot araşdırmalarda iki həftə ərzində hər gün albalı şirəsi içən iştirakçıların daha uzun yatdığı və gecə daha az oyandığı müəyyən edilib.
Alimlər bu təsiri albalının tərkibində olan bioloji aktiv maddələrlə əlaqələndirirlər. Onların arasında yuxu ritmini tənzimləyən melatonin, serotonin sintezində iştirak edən triptofan, həmçinin maqnezium və iltihab əleyhinə təsiri olan flavonoidlər var. Bu maddələrin birlikdə stress, əhval-ruhiyyə və yuxu hormonlarına təsir göstərə biləcəyi qeyd olunur.
Araşdırmaya görə, yuxusuzluq yaşlı insanların 40–70 faizində rast gəlinir və dərman preparatları çox vaxt yan təsirlərə səbəb olur. Buna görə alimlər yuxunu yaxşılaşdırmaq üçün təhlükəsiz qidalanma üsullarının axtarılmasının vacib olduğunu bildirirlər.
Bundan əvvəl aparılan digər tədqiqatlarda isə tünd rəngli şirin albalının tərkibindəki maddələrin süd vəzi xərçəngi hüceyrələrinin inkişafını ləngidə biləcəyi də qeyd olunub.
Mənbə: mail.ru