Bugun.tv xəbər verir ki, Çinin cənubundakı Hunan əyalətində fişəng istehsal edən zavodda baş verən güclü partlayış nəticəsində 26 nəfər həyatını itirib, 61 nəfər yaralanıb.
Məlumata görə, hadisə əyalətin inzibati mərkəzi olan Çanşa şəhərinin Liuyan rayonunda yerləşən Huasheng Fireworks şirkətinə məxsus müəssisədə qeydə alınıb.
Çanşa şəhərinin meri Çın Bojanq bildirib ki, partlayış zamanı zavodda çalışan 26 işçi həlak olub. Yaralılardan 6 nəfərin vəziyyəti ağır qiymətləndirilir və onlar reanimasiya şöbəsində müalicə alırlar.
Hadisədən sonra yanğınsöndürmə, təcili yardım, polis və səhiyyə xidmətlərindən 1500 nəfərlik heyət əraziyə cəlb olunub. Axtarış-xilasetmə işlərinin böyük hissəsinin artıq başa çatdığı açıqlanıb.
Si Cinpin hadisə ilə bağlı dərhal araşdırma aparılmasını, məsul şəxslərin cavabdehliyə cəlb olunmasını və istehsalat təhlükəsizliyi tədbirlərinin gücləndirilməsini tapşırıb.
Qeyd edək ki, Liuyan rayonu Çində əyləncə məqsədli partlayıcı vasitələrin əsas istehsal mərkəzlərindən biri hesab olunur.
Mənbə: TrtHaber