Bugun.tv xəbər verir ki, yeni elmi araşdırma 2025-ci ildə dünya üzrə meşə yanğınlarının ümumi sahəsinin azaldığını, lakin yanğınların təsirinin daha dağıdıcı xarakter aldığını ortaya qoyub.
Nüfuzlu The Guardian nəşrinin yaydığı məlumata əsasən, ötən il qlobal miqyasda təxminən 335 milyon hektar ərazi yanıb ki, bu da 2002-ci ildən bəri ikinci ən aşağı göstəricidir. Buna baxmayaraq, yanğınlar əsasən ABŞ, Kanada, Avropa və Cənubi Koreya kimi daha sıx və inkişaf etmiş bölgələrdə baş verdiyi üçün insan və iqtisadi itkilər artıb.
Tədqiqat göstərir ki, Kaliforniya, İspaniya, Portuqaliya və Cənubi Koreyada baş verən güclü yanğınlar minlərlə evin məhv olmasına, kütləvi təxliyələrə və infrastruktur itkilərinə səbəb olub. Alimlər bildirirlər ki, bu yanğınlar “meşə-şəhər sərhədi” adlanan riskli zonalarda daha sürətlə yayılır.
İqlim dəyişikliyi üzrə tədqiqatçılar qeyd edirlər ki, qlobal istiləşmə ekstremal hava şəraitini gücləndirərək yanğınların daha sürətli və partlayıcı şəkildə yayılmasına şərait yaradır. Eyni zamanda kənd ərazilərində torpaq istifadəsinin dəyişməsi bəzi bölgələrdə ümumi yanma sahəsini azaldır.
Şərqi İngiltərə Universitetindən iqlimşünas Matthew Jones bildirib ki, “qlobal miqyasda daha az yanmış sahə olsa belə, təsirlər daha dağıdıcı ola bilər”. Araşdırmada həmçinin vurğulanır ki, ekstremal yanğınların yaratdığı tüstü və çirklənmə minlərlə insanın sağlamlığına ciddi təsir göstərir.
Ekspertlər hesab edirlər ki, gələcəkdə əsas problem yanğınların sayının azaldılması deyil, onların yaratdığı risklərə qarşı şəhər və kənd ərazilərinin dayanıqlığının artırılmasıdır.
Mənbə: The Guardia