Bugun.tv xəbər verir ki, Ermənistanda iyunun 7-də keçirilən parlament seçkilərinin nəticələrinə qarşı çıxan müxalifət qüvvələri seçkilərin ləğvi tələbi ilə məhkəməyə müraciət edib.
Məlumata görə, Rusiyaya yaxın mövqeyi ilə tanınan müxalifət partiyaları seçki günü və seçkiqabağı dövrdə müxtəlif qanun pozuntularının baş verdiyini iddia edərək Mərkəzi Seçki Komissiyasına rəsmi şikayət təqdim ediblər.
Müxalifətdə təmsil olunan Güclü Ermənistan Partiyasının nümayəndəsi Aram Vardevanyan İrəvanda jurnalistlərə açıqlamasında seçkilərin nəticələrinin ləğv edilməsini tələb etdiklərini bildirib. O, seçki prosesində baş verdiyi iddia olunan pozuntuların araşdırılmasını istədiklərini və səsvermənin ədalətli şəraitdə keçirilmədiyini vurğulayıb.
Müxalifət bəzi seçki məntəqələrində səsvermə zamanı qanun pozuntularının qeydə alındığını, həmçinin müxtəlif təzyiqlərin seçki mühitinə mənfi təsir göstərdiyini iddia edir.
Qeyri-rəsmi nəticələrə əsasən, Baş nazir Nikol Paşinyan rəhbərlik etdiyi Vətəndaş Müqaviləsi Partiyası səslərin 49,8 faizini toplayaraq seçkilərdə birinci olub. Güclü Ermənistan Partiyası isə 23,2 faiz səs qazanıb.
Ermənistan Mərkəzi Seçki Komissiyası apardığı araşdırmaların nəticəsində iki seçki məntəqəsində səsvermənin nəticələrini etibarsız hesab edib. Yerli KİV-lərin məlumatına görə, buna səbəb kimi səsvermə və səslərin sayılması zamanı məntəqələrdə çoxlu sayda hərbçinin olması göstərilib.
Müxalifət həm seçki günü baş verən hadisələr, həm də seçkiqabağı kampaniya dövrü ilə bağlı ciddi iradlar səsləndirib. Müxalif dairələr bəzi namizədlər və onların tərəfdarlarının saxlanılmasının seçki mühitinə mənfi təsir göstərdiyini bildirirlər.
Hakimiyyət isə seçkilərin ölkə qanunvericiliyinə uyğun keçirildiyini və səsləndirilən ittihamların siyasi xarakter daşıdığını bəyan edib.
Mənbə: İLKHA