Bugun.tv xəbər verir ki, Rusiyanın Federal Təhlükəsizlik Xidməti (FSB) Rostov-na-Donu şəhərində yerləşən Rostov-Mərkəzi hərbi aerodromuna qarşı planlaşdırılan terror hücumunun hazırlıq mərhələsində qarşısının alındığını açıqlayıb.
FSB-nin məlumatına görə, Rostov vilayətində yaşayan Rusiya vətəndaşı Ukraynanın Baş Kəşfiyyat İdarəsi (BKİ) tərəfindən pul müqabilində təxribat törətməyə cəlb olunmağa çalışılıb. Bildirilir ki, həmin şəxs təklif aldıqdan sonra könüllü şəkildə təhlükəsizlik orqanlarına müraciət edib və planlaşdırılan hücum barədə məlumat verib. Sonrakı əməliyyat FSB əməkdaşlarının nəzarəti altında həyata keçirilib.
Qurumun açıqlamasına əsasən, şübhəli şəxs Ukrayna tərəfdən FPV tipli pilotsuz uçuş aparatlarının yerləşdiyi anbarın koordinatlarını və hücumun icrası ilə bağlı təlimatları alıb. Daha sonra təhlükəsizlik qüvvələri dronları aşkar edərək zərərsizləşdirib. FSB bildirir ki, şübhəli şəxs vəd edilən pulun 20 faizi həcmində avans aldıqdan sonra onunla əlaqə kəsilib.
Rusiya xüsusi xidməti iddia edir ki, hücum zamanı süni intellekt elementləri ilə təchiz olunmuş və hər biri bir kiloqramdan artıq partlayıcı maddə daşıyan 13 FPV dronundan istifadə planlaşdırılıb. Qurumun məlumatına görə, məqsəd hərbi aerodromun infrastrukturuna zərbə vurmaq, hərbçiləri öldürmək və aviasiya texnikasına ciddi ziyan yetirmək olub.
FSB hadisə ilə bağlı araşdırmaların davam etdiyini və planlaşdırılan hücumun hazırlanmasında iştirak edən bütün şəxslərin müəyyənləşdirilməsi istiqamətində əməliyyat-axtarış tədbirlərinin görüldüyünü bildirib.
Mənbə: TASS