Alimlər Atlantik okeanının dibində yerləşən süxurların dərin qatlarında temperaturu 300 dərəcə Selsidən yuxarı olan su ehtiyatları aşkar ediblər. Mütəxəssislərin fikrincə, bu kəşf gələcəkdə təmiz enerji texnologiyalarının inkişafına mühüm töhfə verə bilər.
Araşdırmalara görə, okean suyu dəniz dibindəki çatlar vasitəsilə yerin dərin qatlarına sızaraq yüksək temperaturun təsiri altında hidrotermal mayeyə çevrilir. Daha sonra bu maye yenidən səthə doğru hərəkət edərkən hidrogen, metan və müxtəlif minerallarla zənginləşir.
Alimlər bildirirlər ki, bu proses zamanı böyük həcmdə təbii hidrogen yaranır. Xüsusilə mantiya mənşəli ultramafik süxurlarla suyun qarşılıqlı təsiri nəticəsində əmələ gələn hidrogen gələcəkdə karbon emissiyası yaratmayan alternativ enerji mənbələrindən biri ola bilər.
Tədqiqatçılar qeyd edirlər ki, eyni geoloji proses nəticəsində metan və digər üzvi birləşmələr də formalaşır. Bu isə həm geotermal enerji sahəsində, həm də Yer üzündə həyatın yaranmasının öyrənilməsi istiqamətində yeni elmi imkanlar yaradır.
Mütəxəssislərin fikrincə, okean dibində yerləşən bu hidrotermal sistemlər gələcəkdə təmiz enerji istehsalı, geotermal tədqiqatlar və geologiya sahəsində mühüm əhəmiyyət daşıya bilər.
Mənbə: Ensonhaber