Bugun.tv xəbər verir ki, beynəlxalq alimlər qrupu Qrenlandiyada buzlaqların sürətlə əriməsini və bunun Atlantik okeanındakı cərəyanlara təsirini araşdırmaq üçün genişmiqyaslı elmi ekspedisiyaya başlayıb. Tədqiqatın nəticələrinin iqlim dəyişikliyinin gələcək təsirlərini daha dəqiq proqnozlaşdırmağa kömək edəcəyi bildirilir.
Ekspedisiyada 80-ə yaxın alim və ekipaj üzvü iştirak edir. Onlar Böyük Britaniyanın RSS Sir David Attenborough qütb tədqiqat gəmisi ilə beş-altı həftə ərzində Qrenlandiya sahillərində araşdırmalar aparacaqlar. Layihə çərçivəsində pilotsuz sualtı aparatları, dronlar, peyklər və digər müasir avadanlıqlardan istifadə ediləcək.
Tədqiqatın əsas məqsədi buzlaqlardan ərimə nəticəsində okeana qarışan şirin suyun Atlantik okeanının əsas cərəyanlarından biri olan AMOC sisteminə təsirini öyrənməkdir. Alimlər xəbərdarlıq edirlər ki, bu cərəyanın zəifləməsi gələcəkdə Avropa və digər regionlarda hava şəraitinin kəskin dəyişməsinə, dəniz səviyyəsinin yüksəlməsinə və ekstremal iqlim hadisələrinin artmasına səbəb ola bilər.
Toplanacaq məlumatlar buzlaqların gələcəkdə necə dəyişəcəyini daha dəqiq proqnozlaşdırmağa və erkən xəbərdarlıq sistemlərinin hazırlanmasına töhfə verəcək.
Mənbə: Reuters