Bugun.TV xəbər verir ki, Fransanın şərqində yerləşən Burqoin-Jallieu şəhərində kolleksiya kartları üzrə ixtisaslaşmış mağazaya basqın edilib. Hadisə zamanı təxminən 80 min avro dəyərində Pokémon kartı oğurlanıb.
Fransa Xəbər Agentliyinə (AFP) açıqlama verən mağaza rəhbərinin sözlərinə görə, hadisə səhər saat 04:00 radələrində baş verib.
Üzü maskalı dörd nəfər mağazanın əsas qapısını sındıraraq içəri daxil olub. Həyəcan siqnalının işə düşməsindən sonra oğrular avtomobillə hadisə yerindən qaçıblar. Onlar “Smogtrade” mağazasından yüzlərlə Pokémon kartı götürüblər.
Məlumata görə, oğurlanan məhsulların demək olar ki, hamısı Pokémonun Yapon buraxılışına aid kartlar olub.
Son illərdə kolleksiyaçılar arasında yüksək qiymətə satılan Pokémon kartları Fransa və dünyanın müxtəlif ölkələrində oğurluqların hədəfinə çevrilir.
2024-cü ilin fevralında Fransanın Renn şəhərində təxminən 100 min avro dəyərində on minlərlə Pokémon kartı oğurlayan üç şəxs həbs cəzasına məhkum edilmişdi.
Bundan başqa, ötən ilin yanvarında Böyük Britaniyada yerləşən xüsusi mağazadan təxminən 88 min avro dəyərində Pokémon kartı oğurlanmışdı. Həmin ilin fevralında isə nadir Pikachu kartlarından biri hərracda 14,3 milyon avroya satılaraq rekord müəyyənləşdirib.
Mənbə: TRT Haber