Bugun.tv xəbər verir ki, İran İsveç diplomatına ölkəni tərk etməsi üçün 48 saat vaxt verib.
Al Jazeera-nın Reuters-ə istinadən yaydığı məlumata görə, Tehran bu qərarı İsveçin bir gün əvvəl İranın Stokholmdakı səfirliyinin əməkdaşlarından birini ölkədən çıxarmasından sonra qəbul edib. İran Xarici İşlər Nazirliyi İsveçin addımını “əsassız” adlandırıb.
İran tərəfi İsveçin siyasətini, o cümlədən anti-İran qruplarına ev sahibliyi etdiyini iddia etdiyi fəaliyyəti tənqid edib. İran Xarici İşlər Nazirliyinin Qərbi Avropa üzrə baş direktoru Əlirza Yusifinin İsveçin Tehrandakı səfirini çağıraraq etirazını bildirdiyi açıqlanıb.
İsveç Xarici İşlər Nazirliyi isə sentyabrın 16-da iranlı diplomatik əməkdaşdan diplomatik fəaliyyət qaydalarına uyğun olmayan fəaliyyətlə əlaqədar ölkəni tərk etməsini tələb etdiyini açıqlamışdı.
İsveç rəsmiləri qərarın ölkə vətəndaşlarının və milli maraqların qorunması məqsədi daşıdığını bildiriblər. Tehran isə cavab tədbirini diplomatik qarşılıq kimi təqdim edib.
Beləliklə, iki ölkə arasında diplomatik gərginlik qarşılıqlı diplomatların ölkədən çıxarılması ilə daha da artıb.
Mənbə: Aljazeera