Bugun.tv xəbər verir ki, BMT-nin Yəmən üzrə xüsusi nümayəndəsi Hans Grundberg ölkədə artan qarşıdurmanın qarşısını almaq məqsədilə husilərin nümayəndələri ilə görüşüb.
Grundberg bildirib ki, o, həftəsonu Oman paytaxtı Maskatda husilərin baş müzakirəçisi Məhəmməd Əbdül-Səlamla danışıqlar aparıb. Görüşdə əsas məqsəd Yəməndə vəziyyətin daha da gərginləşməsinin qarşısını almaq yollarını araşdırmaq olub.
BMT nümayəndəsi daha sonra Səudiyyə Ərəbistanının paytaxtı Ər-Riyadda Yəmənin beynəlxalq səviyyədə tanınmış hökumətinin və regional tərəflərin nümayəndələri ilə də görüş keçirib.
AP-nin məlumatına görə, Yəmənin qərb sahillərində son həftələrdə döyüşlərin şiddətlənməsi nəticəsində azı 838 nəfər ölüb, 3 640-dan çox insan yaralanıb. BMT-nin miqrasiya qurumunun məlumatına əsasən, 145 mindən çox insan ölkə daxilində evlərini tərk etmək məcburiyyətində qalıb.
Qarşıdurmanın Qırmızı dəniz sahillərinə yaxınlaşması Bab əl-Məndəb boğazı ilə beynəlxalq dəniz ticarətinə də təhlükə yaradır. BMT nümayəndəsi kommersiya gəmilərinə hücumların artmasının ciddi narahatlıq doğurduğunu bildirib.
Mənbə: Associated Press (AP)