Milli Məclisin deputatı Vüqar Bayramov bəzi kateqoriyadan olan vətəndaşların pensiyalarının yeni qaydalarla hesablanacağını sosial media hesabında açıqlayıb. Dəyişikliklərə əsasən, həmin şəxslərin fərdi hesablarındakı pensiya yığımları əsasında müəyyənləşdirilən aylıq pensiya məbləğinə sabit əlavələr ediləcək.
Bugun.tv xəbər verir ki, deputat Vüqar Bayramovun sözlərinə görə, “Əmək pensiyaları haqqında” Qanuna müvafiq dəyişikliklər Milli Məclisdə üçüncü oxunuşda qəbul olunub. Dəyişikliklər Prezident tərəfindən təsdiqləndikdən sonra qüvvəyə minəcək. Qüvvədəolma tarixi isə cari ayın ilk günündən hesablanacaq.
Hansı şəxslərin pensiyaları artacaq?
Vüqar Bayramov bildirib ki, yenilik dövlət qulluqçularını, Müdafiə Nazirliyinin hərbi qulluqçularını və digər müəyyən kateqoriyadan olan şəxsləri əhatə edir.
Deputatın izahına görə, hazırda bu kateqoriyaya daxil olan şəxslərin pensiyaları müəyyən edilərkən əməkhaqqı məbləği əsas götürülür. Yeni mexanizm isə pensiyanın fərdi şəxsi hesabda toplanmış pensiya kapitalı əsasında hesablanmasını və həmin məbləğə sabit aylıq əlavənin edilməsini nəzərdə tutur. Beləliklə, sığorta mexanizminin gücləndirilməsi və pensiya məbləğinin yeni qaydada müəyyənləşdirilməsi hədəflənir.
Pensiya artımı necə hesablanacaq?
Deputat hesablamanı nümunə ilə izah edib. Tutaq ki, vətəndaşın 100 min manat pensiya kapitalı var. Bu məbləğin 85 faizi fərdi hesabda nəzərə alınarsa, hesabda 85 min manat qalacaq.
Həmin məbləğ 144-ə bölündükdə aylıq pensiyanın yığım əsasında hesablanan hissəsi təxminən 590,28 manat təşkil edəcək. Vətəndaş müvafiq xüsusi kateqoriyaya aid olduğu halda, bu məbləğin üzərinə qanunvericiliklə müəyyən ediləcək sabit aylıq əlavə də gələcək.
Beləliklə, yekun pensiya məbləği fərdi hesab üzrə hesablanan pensiya ilə sabit əlavənin cəmindən ibarət olacaq. Əlavənin konkret məbləği isə müvafiq icra hakimiyyəti orqanının müəyyən etdiyi qurum tərəfindən müəyyənləşdiriləcək.
Pensiyalar müraciət olmadan təyin ediləcək
Vüqar Bayramovun sözlərinə görə, yeni qaydalar pensiyanın və aylıq əlavənin proaktiv, yəni elektron qaydada təyin edilməsini nəzərdə tutur. Bu halda vətəndaşların pensiyanın hesablanması üçün dövlət qurumlarına ayrıca müraciət etməsinə ehtiyac olmayacaq.
Qanun dəyişikliyi təsdiqlənərsə, aylıq əlavənin məbləğini müəyyən edəcək səlahiyyətli qurum da müvafiq fərmanla müəyyənləşdiriləcək.