Bugun.tv xəbər verir ki, BMT-nin Ətraf Mühit Proqramının (UNEP) yeni hesabatına əsasən, ölkələrin mövcud iqlim öhdəlikləri qlobal istiləşməni 1,5 dərəcə Selsi həddinə qaytarmaq üçün tələb olunan emissiya azalmalarını təmin etmir.
Anadolu Agentliyinin 21 oktyabr tarixli məlumatına görə, mövcud milli iqlim öhdəlikləri tam yerinə yetirilsə belə, 2035-ci ilədək qlobal istixana qazı emissiyaları 2025-ci illə müqayisədə cəmi 11–15 faiz azala bilər. Halbuki istiləşmənin artımını məhdudlaşdıran ssenari üzrə həmin dövrədək emissiyaların 45 faiz azaldılması tələb olunur.
İstiləşmə 2,8 dərəcəyə çata bilər
UNEP-in 2026-cı il üzrə “Emissiya boşluğu” hesabatında bildirilir ki, mövcud siyasətlər davam edərsə, bu əsrdə qlobal istiləşmə 2,8 dərəcəyə çata bilər. Ölkələr iqlim öhdəliklərinin hamısını yerinə yetirsələr belə, istiləşmənin təxminən 2,6 dərəcə səviyyəsində qalacağı proqnozlaşdırılır.
Hesabata əsasən, emissiyaların 2030-cu ilədək 18 faiz, 2040-cı ilədək isə 69 faiz azaldılması da nəzərdə tutulan iqlim ssenarisinin əsas tələblərindəndir. Hesablamalar 2025-ci ilin göstəriciləri ilə müqayisəyə əsaslanır.
Bərpa olunan enerjiyə keçid vacibdir
BMT mütəxəssisləri istiləşmənin azaldılması üçün daha sürətli və davamlı tədbirlərin görülməsinə çağırırlar. Bərpa olunan enerji mənbələrinin genişləndirilməsi və iqlim siyasətlərinin gücləndirilməsi artıq bəzi ölkələrdə emissiyaların azalmasına kömək edib.
Bununla belə, hesabat qlobal temperatur artımını məhdudlaşdırmaq üçün ölkələrin daha ciddi öhdəliklər götürməli və mövcud planları sürətlə həyata keçirməli olduğunu vurğulayır.
Mənbə: Anadolu Agentliyi