Hindistanın Azərbaycandakı səfirliyi Bakıdakı diplomatik nümayəndəliyində “Bir dostluq, iki ölkə: Hindistan və Azərbaycan” adlı rəsm sərgisi və Hindistanın klassik ədəbi əsəri “Pançatantra”dan hekayələrin oxu sessiyasını təşkil edib.
Bugun.Tv xəbər verir ki, 1 noyabr 2026-cı il tarixində keçirilən tədbir Hindistan və Azərbaycanın zəngin incəsənət ənənələrini və çoxəsrlik mədəni əlaqələrini qeyd etmək məqsədi daşıyıb. Proqramda müxtəlif yaş qruplarından olan azərbaycanlı tələbələr və gənc rəssamlar iştirak ediblər.
Səfir: İncəsənət insanları bir araya gətirir
Hindistanın Azərbaycandakı səfiri Abhay Kumar çıxışında incəsənətin insanları bəzən sözlərin ifadə edə bilmədiyi şəkildə birləşdirdiyini bildirib.
O qeyd edib ki, Hindistan və Azərbaycan zəngin tarixləri və müxtəlif mədəni ənənələri ilə seçilir. Səfir gənc azərbaycanlı tələbə və rəssamların incəsənətə marağını yüksək qiymətləndirərək onların yaradıcılığının mədəni irsin gələcək nəsillərə ötürülməsinə töhfə verəcəyini vurğulayıb.
Sərginin mövzusunun iki ölkə arasında əsrlər boyu davam edən mədəni qarşılıqlı əlaqələri və qarşılıqlı hörmətə əsaslanan münasibətləri əks etdirdiyini deyən Abhay Kumar Bakıdakı tarixi Atəşgah məbədini bu əlaqələrin nümunələrindən biri kimi göstərib.
Səfir məbəddəki svastika rəmzləri, devanagari yazısı ilə həkk olunmuş kitabələr, eləcə də Qaneşa və Nataraca təsvirlərinin tarixi mədəni mübadilənin izlərini daşıdığını qeyd edib. O, incəsənət, ədəbiyyat və ənənələrin gənc nəsillərlə paylaşılmasının əhəmiyyətini vurğulayıb.
“Pançatantra”dan hekayələr təqdim olunub
Tədbirin əsas hissələrindən biri səfir Abhay Kumarın rəhbərliyi ilə keçirilən interaktiv oxu sessiyası olub. İştirakçılara Hindistanın məşhur klassik əsəri “Pançatantra”dan hekayələr təqdim edilib.
Müxtəlif mədəniyyətlərdə və nəsillərdə yayılan bu hekayələr gənc azərbaycanlıların marağına səbəb olub. Azərbaycanda “Kəlilə və Dimnə” adı ilə tanınan ədəbi irs dostluq, müdriklik və insan münasibətləri haqqında fikirləri ilə oxucular arasında populyarlığını qoruyur.
Səfir tədbirdə iştirak edən rəssamlarla da söhbət edib, onların əsərləri ilə tanış olub. Hindistan və Azərbaycan arasında tarixi və sivilizasiya əlaqələrini əks etdirən yaradıcılıq nümunələri yüksək qiymətləndirilib.
Hindistanın tarixi abidələri barədə məlumat verilib
Proqram çərçivəsində iştirakçılar Hindistanın UNESCO-nun Ümumdünya İrs Siyahısına daxil edilmiş abidələrinə həsr olunan səfirliyin daimi sərgisi ilə tanış olublar. Bələdçili ekskursiya zamanı ölkənin tarixi, memarlıq nailiyyətləri və mədəni müxtəlifliyi barədə məlumat verilib.
Tədbirdə azərbaycanlı sənətçinin Hindistan musiqisi və rəqslərini əhatə edən canlı çıxışı da təqdim olunub. Gənc rəssamların yaradıcılıq töhfələrini qiymətləndirmək məqsədilə onlara iştirak sertifikatları verilib.
Hindistan səfirliyi bu təşəbbüsün iki xalq arasında birbaşa əlaqələrin inkişafına və xüsusilə gənclər arasında mədəni münasibətlərin möhkəmlənməsinə xidmət etdiyini bildirib. Tədbir incəsənət, hekayəçilik və mədəni mübadilə vasitəsilə Hindistan və Azərbaycan xalqlarını yaxınlaşdırmaq məqsədi daşıyıb.
