Bugun.Tv xəbər verir ki, Səudiyyə Ərəbistanı və Suriya arasında müdafiə sahəsində əməkdaşlığın genişləndirilməsini nəzərdə tutan saziş imzalanıb. Sənəd Suriya Prezidenti Əhməd əş-Şaraanın Ər-Riyada səfəri zamanı iki ölkənin nümayəndələri tərəfindən imzalanıb.
“Reuters”in məlumatına görə, əş-Şaraa səfər çərçivəsində Səudiyyə Ərəbistanının vəliəhdi və baş naziri Məhəmməd bin Salmanla görüşüb. Tərəflər arasında imzalanan müdafiə sazişinin konkret şərtləri və əməkdaşlığın hansı istiqamətləri əhatə edəcəyi hələ açıqlanmayıb.
Suriyaya 403 milyon dollardan artıq kredit ayrılacaq
Səfər zamanı iqtisadi və sosial sahələrdə də bir sıra razılaşmalar əldə olunub. Səudiyyə İnkişaf Fondu Suriyanın Maliyyə Nazirliyi ilə ümumi dəyəri 403 milyon dolları aşan altı güzəştli inkişaf krediti haqqında saziş imzalayıb.
Vəsaitlərin enerji, su təchizatı, səhiyyə, mənzil, infrastruktur və rəqəmsal inkişaf sahələrinə yönəldilməsi nəzərdə tutulur. Layihələr arasında Hələb İstilik Elektrik Stansiyasının bərpası, xəstəxanaların yenilənməsi və zədələnmiş yaşayış evlərinin təmiri də var.
Qeyd edək ki, müdafiə sazişi Yəməndə husilərin Səudiyyə Ərəbistanına qarşı raket və pilotsuz uçuş aparatları ilə hücumlarının davam etdiyi bir dövrdə imzalanıb.
Mənbələr: Reuters