Türkiyə tərəflərin taxıl sazişinin uzadılmasına müsbət yanaşmasını görür və onun uzadılacağına əmindir.
Bugun.tv xəbər verir ki, bunu Türkiyənin müdafiə naziri Hulusi Akar Anadolu agentliyinə müsahibəsində bildirib.
“Sazişin hər iki tərəfi müsbət yanaşma nümayiş etdirir. Bu prosesin səmərəli nəticəsi olacağına inanırıq. Biz əminik ki, sövdələşmə martın 18-dən sonra uzadılacaq”, – deyə o, bildirib.
Akar əlavə edib ki, müqavilə çərçivəsində təxminən 24 milyon ton taxıl ixrac edilib. Onun daşınmasında 800-ə yaxın gəmi iştirak edib.
“Bəli, razılaşmaların həyata keçirilməsində bəzi xırda çətinliklər var. Lakin bu istiqamətdə Rusiya, Ukrayna və BMT birgə işləyir. Ümumiyyətlə, razılaşmalar heç bir neqativ hal olmadan həyata keçirilir. Bizə gəlincə, Türkiyə sövdələşməni davam etdirmək istəyir. Hesab edirəm ki, Rusiya və Ukrayna da təmaslarımızın nəticələrinə əsasən bu işi davam etdirməyin zəruri olduğunu düşünürlər”, – deyə o bildirib.
Mənbə:TASS