Bərdə rayonunda Şəhid Turqut Fikrətoğlunun plakatını söküb, yerinə supermarketlərdən birinin reklamını vurublar.
Bugun.tv xəbər verir ki, bu barədə şəhidin anası Zibeydə Zeynalova sosial media hesabında bildirib. Sözügedən yazının görüntüsünü təqdim edirik:
Məsələni araşdırmaq üçün Bərdə RİH-nin İctimai-siyasi və humanitar məsələlər şöbəsinin baş məsləhətçisi Səbuhi Qasımovla əlaqə saxladıq. O, plakatın yeniləmək məqsədi ilə söküldüyünü və ora heç bir reklam vurulmadığını bildirdi.
Məsələyə aydınlaq gətirmək üçün Şəhidin anası Zibeydə Zeynalova ilə də danışdıq. Onun sözlərinə görə, Turqut həmişə bu maqazinin qarşısında oturduğu üçün xatirəsini əbədiləşdirmək məqsədi ilə plakatı ora vurublar. “Bir də gördüm ki, kimsə oğlumun fotosunu söküb. Bu gün ad günümdür. Bu mənə ən pis hədiyyə oldu. Elə bildim ki, Turqut ölən gündür. O cür ağır hisslər yaşadım. O plakatda Turqutla bərabər, Milli Qəhrəman Polad Həşimov və Mübariz İbrahimovun da şəkli var. Başa düşə bilmədim, Vətən uğrunda canından keçən insanların şəkli şəhərin gözəlliyini pozur? “, – şəhid anası Z.Zeynalova deyib.
Mövzuya yenidən qayıdacağıq.