Tarixin çətin sınaqlarından birgə çıxan dostluq, qardaşlıq münasibətləri -Azərbaycan-Türkiyə birliyi. Bu münasibət bütün sahələrdə olduğu kimi hərbi sahədə də özünü büruzə verir. Son olaraq “Qardaş yumruğu” birgə hərbi təlimləri dünyaya bir mesaj idi. Qısa zaman öncə türkiyəli general polkovnik Bəxtiyar Ersayın müdafiə nazinin müşaviri təyin olunması əlaqələrimizin sıxlığından xəbər verir. Bugun.tv xəbər verir ki, Milli Məclisin deputatı, Müdafiə, Təhlükəsizlik və Korrupsiyaya qarşı mübarizə komitəsinin üzvü Arzu Nağıyev bu təyinata münasibət bildirib.
“Bəxtiyar Ersay Azərbaycan Ordusunun nəyə qadir olduğunu yaxşı bilən və onun Türkiyə standartlarına uyğun olaraq yenidən qurulmasında iştirak edən Türkiyə Ordusunun önəmli simalarındandır. Keçirilən təlimlərdə Bəxtiyar Paşanın çox böyük rolu olub. Bizi birləşdirən ümumi maraqlardan başqa həm də qardaşlıq münasibətləridir. Bəxtiyar Ersayın milli kadrların yetişdirilməsində müstəsna rolu var. Öz sahəsinin peşəkarı olan birinin müdafiə nazirinin müşaviri təyin olunması mühüm addımdır”.