İran ilə ABŞ arasında iki həftəlik atəşkəs elan edildikdən sonra paytaxt Tehranda minlərlə insan küçələrə çıxıb.
Məlumata əsasən, aksiya iştirakçıları İran bayraqlarını dalğalandırıb, ölkənin ali dini lideri Müctəba Xameneinin plakatlarını daşıyıblar. Küçələrdə toplaşan insanların münaqişədən sonra rahatlıq və dəstək mesajları verdiyi müşahidə olunub.
Xatırladaq ki, Donald Trump ABŞ ilə İran arasında əldə olunan razılaşmanı “ikitərəfli atəşkəs” kimi qiymətləndirib. İran tərəfi isə bu müddət ərzində Hörmüz boğazından təhlükəsiz keçidin təmin ediləcəyini bildirib.
Bildirilib ki, tərəflər arasında növbəti danışıqların 10 aprel tarixində İslamabad şəhərində keçirilməsi planlaşdırılır.
Hadisə yerindən yayılan görüntülər Tehranda geniş kütlənin atəşkəsi dəstəklədiyini və bölgədə gərginliyin azalmasına ümid etdiyini göstərir.
Mənbə: TrtWorld