Rusiya Xarici İşlər Nazirliyi ABŞ tərəfindən ələ keçirilmiş Rusiya bayrağı altında üzən neft tankerinin heyət üzvlərindən iki Rusiya vətəndaşını azad etmək qərarına gəldiyini açıqladı.
Məlumata görə bu barədə, Rusiya Xarici İşlər Nazirliyinin sözçüsü Mariya Zaxarova nazirliyin Telegram kanalında dərc olunmuş açıqlamasında bildirib: “Bizim xahişimizlə ABŞ prezidenti Donald Tramp Şimali Atlantikada əməliyyat zamanı ABŞ tərəfindən saxlanılan Marinera tankerinin heyət üzvlərindən iki Rusiya vətəndaşını azad etmək qərarına gəldi. Biz bu qərarı alqışlayırıq və ABŞ rəhbərliyinə minnətdarlığımızı bildiririk”.
Rusiya bayrağı altında üzən Marinera tankeri 7 yanvarda Şimali Atlantikada ABŞ Sahil Mühafizəsi tərəfindən ələ keçirilib. ABŞ Avropa Komandanlığı (EUCOM) ələ keçirmə əməliyyatını təsdiqləyib.
Ağ Ev Marinera neft tankerinin heyətinin ABŞ-da federal məhkəmədə ifadə verəcəyini açıqlayıb. Ağ Evin sözçüsü Kerolin Levitt tankerin ABŞ sanksiyalarını pozduğuna görə ələ keçirildiyini və əvvəllər Bella 1 kimi tanınan və sanksiyalı neft daşıdığı iddia edilən “Venesuela kölgə donanmasına” aid olduğunu açıqladı. ABŞ Baş prokuroru Pam Bondi bildirib ki, tankerin ələ keçirilməsindən sonra ABŞ Ədliyyə Nazirliyi bir neçə başqa gəmini də izləyir.
8 yanvarda Rusiya Xarici İşlər Nazirliyi 7 yanvarda ABŞ ordusu tərəfindən 24 dekabrda Rusiya bayrağı altında üzmək üçün müvəqqəti icazə almış Marinera tankerinə qarşı həyata keçirilən “qanunsuz hərbi əməliyyatlar”la bağlı ciddi narahatlığını bildirib. Rusiya Xarici İşlər Nazirliyi həmçinin ABŞ-dan “tankerdəki Rusiya vətəndaşlarına qarşı insani və ləyaqətli rəftarın təmin edilməsini, onların hüquq və mənafelərinə mütləq hörmət edilməsini və onların tez bir zamanda evə qayıtmalarına mane olmamasını” tələb edib.
Mənbə: İlkha