Çinli tədqiqatçılar natrium-ion batareyaları üçün tam yanmaz elektrolit hazırlayıblar. Yeni texnologiya batareyalarda baş verən yanğın və partlayış riskini minimuma endirir.
Araşdırma nəticələri Nature Energy jurnalında dərc olunub. Alimlər bildirirlər ki, yeni elektrolit adi maye kimi davranmır – o, temperaturun kəskin artması zamanı dərhal sərtləşərək qoruyucu baryer yaradır.
Məlumata görə, batareyalarda ən təhlükəli proseslərdən biri olan “istilik qaçışı” (thermal runaway) bu texnologiya ilə effektiv şəkildə bloklanır. Bu proses zamanı temperaturun artması zəncirvari reaksiyaya səbəb olur və nəticədə partlayış baş verə bilir.
Yeni elektrolit isə yüksək temperatur hiss etdikdə dərhal polimerləşərək elektrodlarla elektrolit arasında möhkəm qat əmələ gətirir. Bu qat qısaqapanmanın qarşısını alır və yanıcı qazların yaranmasını əngəlləyir.
Laboratoriya sınaqları zamanı batareyalar müxtəlif stress testlərindən keçirilib – hətta metal mismarla deşilməsinə baxmayaraq nə tüstü yaranıb, nə də alışma və ya partlayış baş verib.
Tədqiqatçılar bildirirlər ki, bu texnologiya yalnız təhlükəsizliyi artırmır, eyni zamanda batareyaların ömrünü də uzadır. Yeni sistem xüsusilə külək və günəş enerjisi ilə işləyən böyük enerji saxlama sistemləri üçün perspektivli hesab olunur.
Mənbə: mail.ru