Lids Universitetinin rəhbərliyi ilə aparılan yeni bir araşdırma, insan bədəninin opioidlərə bənzər daxili ağrıkəsici sistemə malik olduğunu, lakin asılılıq riski olmadığını ortaya qoydu.
Tədqiqata görə, bədən benzodiazepinlərə bənzər təbii peptidlər istehsal etməklə müəyyən sinir uclarında ağrı siqnallarını azalda bilər. Bu peptidlər onurğa beyni qanqliyalarından əmələ gəlir və yalnız periferik sinir sistemində təsir göstərdikləri üçün opioidlərin yuxululuq, çaşqınlıq və ya asılılıq kimi yan təsirlərinə səbəb olmurlar.
Tədqiqata rəhbərlik edən Lids Universitetinin professoru Nikita Qamper mövcud ağrıkəsicilərin məhdudiyyətlərini qeyd edərək deyib: “Opioidlər hələ də ən güclü ağrıkəsicilərdir, lakin onlar ən yüksək asılılıq riskini daşıyırlar. Daha yaxşılarına ehtiyac var.
Lids Universitetinin ağrı idarəetmə mütəxəssisi Dr. Ganesan Baranidharan xroniki ağrının səhiyyənin üzləşdiyi ən böyük problemlərdən biri olduğunu bildirərək dedi: “Uzunmüddətli opioid və neyroleptik dərmanlar ciddi yan təsirlərə səbəb ola bilər. Bu tədqiqat yeni və təhlükəsiz müalicəyə qapı aça bilər.”
Professor Qamper və onun komandası bu mövzuda tədqiqatlarını davam etdirmək üçün 3,5 milyon funt sterlinq məbləğində yeni maliyyələşdirmə alıblar. Yeni beş illik layihə neyropatik ağrı biomarkerlərini araşdıracaq və bu təbii peptid mexanizminə əsaslanan yeni müalicə metodları hazırlayacaq.
Tədqiqat Lids Universiteti, Çinin Hebei Tibb Universiteti və Sinsinnati Universiteti ilə əməkdaşlıq çərçivəsində aparılıb. Tədqiqatın həmmüəllifi professor Xiaona Du deyib: “Eyni nəticəyə çatdığımızı görəndə bildik ki, onu daha da davam etdirməliyik”.
Bu kəşfin bədənin öz sinir sistemində gizlənmiş təbii ağrı nəzarət mexanizmini ortaya qoyduğu vurğulanıb. Bildirilib ki, tapıntılar təsdiqlənərsə və klinik praktikaya tətbiq olunarsa, gələcəkdə opioidləri əvəz edə biləcək yeni, təhlükəsiz və asılılıq yaratmayan ağrı müalicələri hazırlana bilər.
Mənbə: Hurriyet.com