Beynəlxalq alimlər bildirirlər ki, qlobal istiləşmə nəticəsində Braziliyanın əsas qəhvə istehsalı bölgələrində baş verən güclü yağışlar və daşqınlar daha da şiddətlənə bilər.
Mütəxəssislər bu riskin qarşısını almaq üçün neft, qaz və kömür kimi qalıq yanacaqların istifadəsinin sürətlə azaldılmasını zəruri sayırlar.
Araşdırmada qeyd olunur ki, son bir ay ərzində Minas Gerais ştatında baş verən güclü yağışlar torpaq sürüşmələrinə səbəb olub. Nəticədə onlarla insan həyatını itirib, minlərlə sakin isə evlərini tərk etmək məcburiyyətində qalıb.
Tədqiqatın nəticələrinə görə, xüsusilə Juiz de Fora şəhəri ən çox zərər görən ərazilərdən biridir. Fevral ayında burada 750 millimetrdən çox yağıntı qeydə alınıb ki, bu da həmin dövr üçün normal göstəricidən üç dəfə çoxdur.
Araşdırmanı aparan World Weather Attribution qrupunun alimləri bildirirlər ki, planetin temperaturu hazırkı təxminən 1,3°C səviyyəsindən 2,6°C-yə yüksələrsə, regionda leysan yağışlarının intensivliyi təxminən 7 faiz arta bilər.
Imperial College London-un iqlim elmləri professoru Friederike Otto qeyd edib ki, rekord səviyyəli belə yağışların gələcəkdə adi hala çevrilməsinin qarşısını almaq üçün təcili tədbirlər görülməlidir.
Mütəxəssislər həmçinin bildirirlər ki, daşqınların təsiri yalnız insan tələfatı ilə məhdudlaşmır. Braziliya dünyada arabica qəhvəsinin ən böyük istehsalçılarından biridir və ekstremal hava şəraiti məhsuldarlığı azaldaraq qlobal qəhvə qiymətlərinin artmasına səbəb ola bilər.
Ekspertlər hesab edirlər ki, iqlim risklərinin azaldılması üçün erkən xəbərdarlıq sistemlərinin gücləndirilməsi, təhlükəli ərazilərdə yaşayan insanlar üçün sığınacaqların tikilməsi və şəhərsalma planlarının yenilənməsi vacibdir.
Mənbə: The Guardian