“Ana dilimiz xalqımızın mənəvi dünyasının ən əsas təməl daşlarından biridir. O, sadəcə ünsiyyət vasitəsi deyil, eyni zamanda tariximizi, mədəniyyətimizi, düşüncə tərzimizi və kimliyimizi əks etdirən müqəddəs bir xəzinədir. Hər bir millət öz dilində danışdığı zaman, öz əlifbasını istifadə etdiyi zaman onun ruhu danışır, keçmişi gələcəyə körpü olur. Azərbaycan dili də, əlifbası da bizim milli varlığımızın, azərbaycançılıq ideyasının, milli məfkurəmizin ən parlaq ifadəsidir”- fikirlərini YAP İdarə Heyətinin üzvü, Milli Məclisin deputatı Ülviyyə Həmzəyeva söyləyib.
O qeyd edib ki, tarix boyu Azərbaycan dili böyük sınaqlardan keçmiş, müxtəlif imperiyaların və müstəmləkəçilərin hökmranlığı altında özünü qoruyub saxlamışdır. Bu, xalqımızın iradəsinin, mədəni irsinin və milli kimliyinin göstəricisidir. Ana dilimizin saflığını və varlığını qorumaq Ulu Öndər Heydər Əliyevin əsas vəzifələrindən biri olmuşdur. 1970-ci illərdə Bakıda Azərbaycan Dövlət Universitetinin 50 illik yubileyində ana dilində cəsarətli çıxışı, Azərbaycan dilinin dövlət dili kimi tanınması istiqamətində atılan addımlar o dövrün çətin siyasi şəraitində əsl qəhrəmanlıq idi.
Ulu Öndərin siyasi irsi müstəqillik dövründə də Azərbaycan dilinin inkişafı üçün möhkəm zəmin yaratdı. 1995-ci ildə qəbul olunan Konstitusiyada Azərbaycan dilinin dövlət dili statusunun təsbit olunması milli dövlətçilik tariximizdə mühüm mərhələ oldu. Bundan əlavə, 1 avqust tarixi – Azərbaycan Əlifbası və Azərbaycan Dili Günü kimi qeyd olunmağa başladı və bu gün hər il böyük təntənə ilə xatırlanır.
Prezident İlham Əliyev bu böyük milli irsi uğurla davam etdirir. Onun təşəbbüsü ilə ölkədə ana dilinin inkişafına yönəlmiş çoxsaylı layihələr həyata keçirilir. 2004-cü ildə latın qrafikalı kütləvi nəşrlərin genişləndirilməsi, milli ensiklopediyanın çapı, dünya ədəbiyyatının seçilmiş əsərlərinin Azərbaycan dilində nəşri dilimizin zənginləşməsi və beynəlxalq arenada tanınması baxımından əvəzsiz töhfələrdir. 2013-cü ildə təsdiq olunan “Azərbaycan dilinin qloballaşma şəraitində zamanın tələblərinə uyğun istifadəsinə dair Dövlət Proqramı” isə müasir dövrün çağırışlarına cavab olaraq dilimizin gələcək inkişafına istiqamət verir.
Eyni zamanda, 2018-ci ildə imzalanan sərəncam və fərmanlarla Azərbaycan dilinin elektron məkanda daha geniş istifadəsi və dövlət dilindən istifadənin təkmilləşdirilməsi təmin edilir. Bu, XXI əsrin rəqəmsal dövründə ana dilimizin mövqeyinin gücləndirilməsi üçün vacib addımdır.
Dilimizi, əlifbamızı sevmək və qorumaq hər birimizin vəzifəsidir. Ana dilimiz milli kimliyimizin qoruyucusudur, milli varlığımızın dayağıdır. Dilimizi unudarsaq, kimliyimizi, tariximizi unudarıq. Buna görə də hər bir azərbaycanlı ana dilimizin saflığını, zənginliyini gələcək nəsillərə ötürmək üçün əlindən gələni etməlidir. Bizim dilimizdə mahnılarımız, şeirlərimiz, dastanlarımız yaşamalı, onun hər bir sözü xalqımızın qəlbində əks-səda tapmalıdır.
Ulu Öndərin dediyi kimi:
“Ana dili hər bir xalqın milli varlığının ən əsas atributudur.”
Biz də bu müqəddəs dili sevək, ona sahib çıxaq və qürurla yaşadaq!”.
Ülviyyə Həmzəyeva YAP İdarə Heyətinin üzvü, Milli Məclisin deputatı