“Ölkəmizin Masallı rayonunun Viləş kəndində Ziba xalanın qonağı olduq. Bu müqəddəs gündə şəhid ailəsinin evində olmaq, onların kədəri ilə yanaşı qürurlarına da şahidlik etmək bizim üçün böyük şərəf idi.
Ziba xala iki igid Vətən oğlunun – Azərbaycan Silahlı Qüvvələrinin giziri, Nurlan Əsgərli və Vətən müharibəsi qəhrəmanı İntiqam Əsgərlinin anasıdır. Bu iki qəhrəman şəhidimizin əziz xatirəsini yaşatmaq üçün ailəsi böyük və qiymətli bir təşəbbüslə çıxış edib: evlərinin həyətində möhtəşəm bir muzey inşa etdiriblər. Hər bir detalı ilə ürəklərə toxunan bu muzey həm tərbiyəvi, həm də tarixi baxımdan önəmli bir örnəkdir”.
Bugun.tv xəbər verir ki, bu barədə Regional Hüquqi və İqtisadi Maarifləndirmə İctimai Birliyinin sədri Arzu Bağırova etdiyi ziyarətlə bağlı məlumat verərək deyib.
O həmçinin qeyd edib ki, bu kimi təşəbbüslər bizim milli yaddaşımızın qorunması, gələcək nəsillərin şəhidlərimizin qəhrəmanlığından dərs alması üçün çox önəmlidir.
Ziba xalaya və ailəsinə bu nəcib işlərinə görə dərin təşəkkürümüzü bildiririk. Regional Hüquqi və İqtisadi Maarifləndirmə İctimai Birliyi olaraq şəhid ailələrimizin daim yanındayıq.
Şəhidlər ölməz, Vətən bölünməz!
