BAKI (AA) – Türkiyənin müdafiə sənayesi nəhəngi ASELSAN Azərbaycanda türk modelinə bənzər bir kosmik ekosistem qurmağı hədəfləyir.
Bugun.tv-xəbər verir ki, ASELSAN tərəfindən yerli olaraq inkişaf etdirilən Ku-Band və X-Band rabitə faydalı yüklərə malik TÜRKSAT-6A peyki orbitdəki ilk ilini 9 iyul 2025-ci ildə uğurla başa vurub. Türkiyənin ilk yerli istehsal və milli rabitə peyki olaraq TÜRKSAT-6A performansı ilə diqqətləri üzərinə çəkərək, dünya üzrə rabitə qabiliyyətinə malik yeganə ölkələrdən birinə çevrildi.
Kosmik texnologiyalar sahəsində toplanmış bu təcrübəsini qardaş ölkə Azərbaycanla bölüşmək üçün yeni dövr başlayıb. ASELSAN Azərbaycanın yeni nəsil rabitə peyki Azerspace-3-ün satınalınması təklifi ilə diqqəti cəlb edir.
Məlumatlara görə, ASELSAN təkcə sistem satışı deyil, həm də peykin faydalı yükünün işlənib hazırlanması və istehsalını özündə əks etdirən texnologiya transferi modelini Azərbaycan mühəndisləri ilə birgə təklif edir.
Bu yanaşma Azərbaycana peyk sistemlərinin inkişafında təkcə istifadəçi deyil, həm də tərəfdaş olmaq imkanı verəcək. Bu addım Azərbaycanın yerli mühəndislik potensialını artıracaq və müstəqil kosmik sənaye infrastrukturu yaratmağa imkan verəcək.
ASELSAN-ın rəhbərliyi ilə başlanması planlaşdırılan əməkdaşlıq iki ölkə arasında yeni, yüksək texnologiyalara əsaslanan körpünün yaradılması istiqamətində tarixi addım hesab olunur.
