Bugun.tv xəbər verir ki, bu gün 12 noyabr, Azərbaycan Respublikasında Konstitusiya Günü kimi qeyd olunur.
1995-ci ilin məhz bu günündə xalqımız müstəqil dövlətçiliyinin hüquqi təməlini müəyyənləşdirən, insan hüquq və azadlıqlarının təminatçısı olan ilk milli Konstitusiyasını qəbul edib.
Azərbaycan Konstitusiyası ölkəmizin demokratik inkişaf yolunda atılmış mühüm tarixi addımlardan biridir. Bu sənəd dövlətimizin hüquqi, siyasi və iqtisadi əsaslarını müəyyənləşdirərək, azərbaycançılıq ideyasını və milli birliyimizi möhkəmləndirib.
Ulu Öndər Heydər Əliyev Konstitusiyanın qəbulunu belə dəyərləndirmişdi: “Konstitusiyanın qəbulu Azərbaycanın dövlət müstəqilliyinin möhkəmlənməsində, xalqımızın milli iradəsinin ifadəsində tarixi hadisədir”.
Bu gün Ulu Öndərin müəyyənləşdirdiyi siyasi kursu uğurla davam etdirən Prezident İlham Əliyevin rəhbərliyi ilə Azərbaycan suveren və qüdrətli dövlət kimi inkişafını davam etdirir. Artıq beş ildir ki, torpaqlarımız işğaldan azad olunub, xalqımız bütün bayramlarını, o cümlədən Konstitusiya Gününü azad, müstəqil və qalib ölkə kimi qeyd edir. Bu, həm tarixi ədalətin bərpası, həm də dövlətimizin gücünün təntənəsidir.
Bu gün ölkənin bütün bölgələrində, təhsil ocaqlarında və müxtəlif müəssisələrdə Konstitusiya Gününə həsr olunmuş tədbirlər keçirilir.
Azərbaycan vətəndaşları üçün bu bayram, qanunun aliliyinə, ədalətə və dövlətçiliyə sadiqliyin rəmzidir.
Bugun.tv olaraq biz də xalqımızı bu əlamətdar gün münasibətilə təbrik edir və müstəqil dövlətimizin hüquqi dayaqlarının daha da möhkəmlənməsi yolunda uğurlar arzulayırıq.