Bugun.tv xəbər verir ki, iqtisadçı deputat Vüqar Bayramov Prezident İlham Əliyevin sədrliyi ilə keçirilmiş “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirə ilə bağlı paylaşım edib.
Öz sosial media hesabında açıqlama verən deputat bildirib ki, bu plan ölkəmizin rəqəmsal iqtisadiyyatın inkişafını prioritetləşdirir və süni intellektin, informasiya texnologiyaları və kibertəhlükəsizlik sahələrinin iqtisadi səmərəliliyin artırılmasına xidmət edəcəyini göstərir.
Vüqar Bayramov qeyd edib ki, rəqəmsal arxitektura qərarqəbuletməni daha məhsuldar və şəffaf edir, biznesin inkişafı üçün yeni imkanlar yaradır. Deputat bildirib ki, Azərbaycanın rəqəmsal iqtisadiyyatı qeyri-neft ÜDM-inin 2,8%-ni təşkil edir və sektorun həcmi 3,3 milyard manatdır.
O əlavə edib ki, ABŞ ilə imzalanmış “Strateji Tərəfdaşlıq Xartiyası” bu sahədə əməkdaşlığı daha da dərinləşdirəcək və regionda Azərbaycanın rəqəmsal mərkəzə çevrilməsi hədəflərinə töhfə verəcək.
Vüqar Bayramov vurğulayıb ki, 2026–2029-cu illər üçün hazırlanmış Strategiyanın icrası nəticəsində ölkədə rəqəmsal sektorun ÜDM-də payı artacaq, rəqəmsal xidmətlərin keyfiyyəti və əlçatanlığı yüksələcək, ixtisaslı kadrların sayı artırılacaq və iqtisadi sahələrdə rəqəmsal texnologiyaların tətbiqi genişlənəcək.
