Azərbaycan öz istedadlı, bacarıqlı, savadlı gəncləri ilə hər zaman fərlənib, öndə olub. Kiçik bir araşdırma aparsaq görərik ki, ölkəmiz müxtəlif sahələr – hüquq, tibb, iqtisadiyyat, mühəndis və digər ixtisaslar üzrə kifayət qədər mütəxəssislər yetişdirib və bu gün də davam edir.
Belə gənclərimizdən biri də Təranə Tağıyevadır. O, 1996-cı ildə Moskva şəhərində anadan olub. 2003-cü ildən İngilis təmayüllü məktəbdə təhsil alıb. Burada əlaçı məktəbli kimi həmişə mükafalara layiq görülür, müəllimlərin sevimlisinə çevrilib. Paralel olaraq məktəb illərində müxtəlif olimpiyadalarda iştirak edib, yüksək nəticələr qazanıb.Moskvada skripka və fortepiano üzrə Edverd Qrik adına musiqi məktəbini bitirib. Təranə Tağıyeva hazırda 5 dildə – Azərbaycan, Türk, Rus, İngilis və İspan dillərində mükəmməl bilir.
Tağıyevlər ailəsi hər zaman övladlarının təhsilinə böyük önəm verirlər. Bir müddət sonra vətənə qayıdırlar. T.Tağıyeva təhsilini 7-ci sinifdə, Bakı İstedadlar Liseyində davam etdirir. 9-cu sinifi qırmızı attestatla bitirir. Son təhsil illərini isə 236 nömrəli orta məktəbdə oxuyur. Buranı qızıl medalla qurtarır.
O hələ uşaqikən ixtisas seçimini edir. Arzusu ağ xalatlı həkim olmaq, dövlətə layiq mütəxəssis kimi yetişmək idi. Bu niyyətlə də T.Tağıyeva 2014-cü ildə ən yüksək – 680 balla Azərbaycan Dövlət Tibb Universitetinə daxil olur. Prezidet təqaüdünə layiq görülür. 2020-ci ildə Tibb Universitetinin “Müalicə işi-2” fakültəsinin ingilis sektorunu qırmızı diplomla bitirir.
İzmir şəhərində yerləşən EGE hospitalinda 6 ay təcrübə keçən gənc həkim bu uğurları ilə də kifayətlənmir. Daha da irəli getmək, öz sahəsinə dərindən yiyələnmək, oxuduğu ixtisas üzrə savadlı mütəxəssis kimi yetişmək üçün təhsilini davam etdirmək qərarına gəlir. Bu istəklə də o, Türkiyə Respublikasında keçirilən Uzmanlıq üzrə imtahanlara qatılır və yüksək bal toplayır. Hacettepe Universitetinin Qadın xəstəlikləri və doğum bölümünü qazanan azərbaycanlı tələbə bu ixtisas üzrə Türkiyədə 1-ci yeri tutur.
Azərbaycan gəncinin uğuru hər zaman sevindirir, qürur verir. Biz də Bugun.tv olaraq gələcəyin həkimi Təranə Tağıyevaya fəaliyyətində və gələcək karyerasında uğurlar arzulayırıq!