Pakistanın cənub-qərbində yerləşən Bəlucistan əyalətində silahlı hücumların intensivləşməsi ölkənin təhlükəsizlik gündəmini yenidən ön plana çıxarıb. Xarici media yazır ki, son aylarda baş verən hücumlar təkcə daxili sabitliyə deyil, eyni zamanda Pakistanın Çinlə strateji tərəfdaşlığına və beynəlxalq öhdəliklərinə ciddi təhdid yaradır.
Məlumata görə, hücumların əsas hədəflərindən biri Çin-Pakistan İqtisadi Dəhlizi (CPEC) çərçivəsində həyata keçirilən infrastruktur layihələri və bu layihələrdə çalışan Çin vətəndaşlarıdır. Analitiklər bildirirlər ki, təhlükəsizlik risklərinin artması Çinin Pakistandakı investisiya planlarına yenidən baxmasına səbəb ola bilər. Bu isə İslamabadın iqtisadi inkişaf strategiyasına mənfi təsir göstərə bilər.
Bundan əlavə, Bəlucistandakı qeyri-sabitlik Pakistanın ABŞ və digər beynəlxalq tərəfdaşlar qarşısında terrorla mübarizə və regional təhlükəsizliklə bağlı verdiyi vədləri də sual altına qoyur. Rəsmi dairələr vəziyyətə nəzarətin gücləndirildiyini bildirsə də, mütəxəssislər problemin yalnız hərbi deyil, siyasi və sosial həll yolları tələb etdiyini vurğulayırlar.
Mənbə: Aljazeera.Com