Tanınmış jurnalist, yazıçı-publisist Bahəddin Həzi gənc yazar İlahə Səfərzadə haqqında öz fikirlərini bölüşüb “Əslində azadlıq hər istədiyini etmək deyil, istəmədiyini etməməkdir”…
Sədaqətlə xəyanətin, şübhə ilə gerçəyin, işıqla qaranlığın, zalımla məsumun, ağılla məkrin, həyat eşqi ilə ölüm qorxusunun… qarşı-qarşıya gəlib toqquşduğu hər anın rəsmi! İlahə Səfərzadənin “Gerçəyin izində” kitabını belə səciyyələndirərdim. Romanı maraqla oxudum.
Əsərdə cismani və mənəvi azadlığın və kölələyin sərhədləri elə tez-tez dəyişir, kəsişir, qarışır ki. Əslində azad gördüyümüz insanların qula çevrildiyinin və ya kölə bildiklərimizin azadlığa canatımının bədii sözün gücü ilə canlandırılmış şəklinə baxdım bu romanda.
Bu postun girişindəki fikir romandandır və romanın ana xəttidir.
Əsərin baş qəhrəmanı Səma deyir ki, “səni ən xoşbəxt edən şey bir müddətdən sonra adiləşir, dəyərini itirir”. Ancaq bu əsərdə tərənnüm edilən nəsnə – ruhumuzun azadlığı heç vaxt dəyərini itirmir.