Bugun.tv xəbər verir ki, Bakıdan Şuşaya marafon təşkil olunacaq. Bu barədə televiziyamıza Bakı Marafon Klubunun rəhbəri, ulturamarafoncu Firdovsi Kərim məlumat verib. “Bu il biz, həvəskar qaçış klubu olaraq, bir ilkə imza atacağıq. Bakıdan Şuşaya marafon planlaşdırırıq. İlin sonunadək bizim bu layihəmiz baş tutacaq. Düzdü, məsafə 400 klometrdi, ancaq bu bizi qorxutmur, çəkindirmir”.
F.Kərim təşkil olunan marafonun məqsədini də açıqlayıb. “Məqsədimiz İkinci Qarabağ Müharibəsində, 44 günlük döyüşlərdə şəhid olan igidlərimizin əziz xatirəsini yad etmək, ruhlarını şad etməkdir. Allah rəhmət eləsin!”.
BMK-nın rəhbəri onu da qeyd edib ki, Füzulidə “Marafon bağı” salınacaq.
“Biz də klub olaraq, 66 ağac əkəcəyik. Sonra böyük bir kütlə ilə qaçışı həyata keçirəcəyik. Klubun üzvi çox olduğundan marafon zamanı bir neçə hissəyə bölünəcəyik. Belə ki, təcrübəli insanlar 80-100 kilometr qət edəcəklər. Yeni üzvlərimiz var ki, onlar 5-10 kilometr qaca bilirlər. Layihədə bütün bunlar nəzərə alınacaq”.
Firdovsi Kərimin sözlərinə görə, ümumilikdə, Azərbaycanda qaçış idman növünə maraq göstərənlərin sayı günü gündən artır. Bu Bakı Marafon Klubuna qoşulanların sayında da özünü göstərib.
Müxbir: Arzu İbrahimova, Operator: Samir Əliyev