Vyana Texniki Universitetinin alimləri Cerabyte şirkəti ilə birlikdə dünyanın ən kiçik QR-kodunu hazırlayaraq Ginnesin Rekordlar Kitabına düşüblər.
Bugun.tv xəbər verir ki, tədqiqatçılar cəmi 1,98 kvadrat mikrometr sahəyə malik QR-kod yaradıblar. Bu ölçü əksər bakteriyalardan belə kiçik hesab olunur.
Məlumata görə, rekordun əsas yeniliyi təkcə kodun kiçik ölçüsü deyil, həm də məlumatların saxlanma üsuludur. Alimlər ənənəvi maqnit və elektron daşıyıcılar əvəzinə nazik keramika örtüklərindən istifadə ediblər. Bu materiallar yüksək dayanıqlığı ilə seçilir və ekstremal şəraitdə uzun müddət məlumat saxlamaq qabiliyyətinə malikdir.
QR-kodun hazırlanması üçün fokuslaşdırılmış ion şüası texnologiyası tətbiq olunub. Kodun ayrı-ayrı piksel ölçüləri 49 nanometr təşkil edib ki, bu da görünən işığın dalğa uzunluğundan təxminən 10 dəfə kiçikdir.
Buna görə də kod optik mikroskopla görünmür və yalnız elektron mikroskop vasitəsilə oxuna bilir.
Tədqiqatçılar bildirir ki, bu cür keramika daşıyıcılar enerji sərf etmədən yüz illərlə məlumat saxlaya bilər. Həmçinin texnologiyanın məlumat sıxlığı çox yüksəkdir: bir A4 formatlı sahədə 2 terabaytdan çox informasiya yerləşdirmək mümkündür.
Alimlər hazırda texnologiyanın sənaye miqyasında tətbiqi üçün sürətin artırılması, yeni materialların yoxlanılması və istehsal metodlarının hazırlanması üzərində çalışırlar.
Bu yeniliyin gələcəkdə məlumat mərkəzləri üçün ekoloji alternativ ola biləcəyi və enerji sərfiyyatını, eləcə də karbon emissiyalarını azaltmağa kömək edəcəyi vurğulanır.
Mənbə: mail.ru