İsveçin paytaxtı Stokholmda, Qəzza xalqına dəstək məqsədilə yüzlərlə insan yeni il tədbirlərini ləğv edərək Filistinə dəstək aksiyasında bir araya gəldi.
Çox sayda vətəndaş cəmiyyəti təşkilatının çağırışı ilə Segels Torg Meydanında toplaşan nümayişçilər, İsrailin hücumları nəticəsində həyatını itirən uşaq və mülki sakinlər üçün matəm saxladı.
Nümayişçilər “Qəzzada uşaqlar öldürülür”, “Məktəblər və xəstəxanalar bombalanır”, “Dərhal atəşkəsə əməl edilsin” və “Qida qıtlığına son qoyulsun” yazılı plakatlar daşıdı.
Aksiyada İsrailin Qəzzaya qarşı hərbi əməliyyatlarını dayandırması və İsveçin İsrailə silah satışını dayandırması tələb olundu.
Qrup nümayəndəsinin açıqlamasında bildirilir:
“Yeni ildə Filistindəki kütləvi ölümlərə və blokadaya susmaqla yeni ili başlamırıq. Ədalətsizliyə göz yummuruq”.
Açıqlamada həmçinin İsrail-Filistin münaqişəsində sülh razılaşmalarına əməl olunmadığı vurğulandı:
“Dünya yeni ilə girərkən Filistində soyqırım davam edir. Atəşkəsə baxmayaraq, Filistinlilər həlak olur, blokada qüvvədədir və insanlar çadırlarda donaraq ölmək təhlükəsi ilə üzləşir.”
Nümayişçilər Filistin bayraqları ilə meydanlarda İsveç Parlamentinə doğru yürüş etdi.
Mənbə: Trthaber.com