Beynəlxalq terror qruplaşmasının iki üzvü Tacikistan və Əfqanıstan arasında dövlət sərhədini qanunsuz keçməyə cəhd edərkən öldürülüb.
Bugun.tv xəbər verir ki, bu barədə Tacikistanın Milli Təhlükəsizlik üzrə Dövlət Komitəsindən bildirilib.
“Beynəlxalq terror qruplaşmasının iki üzvü Tacikistan və Əfqanıstan arasında dövlət sərhədini keçib. Onlar respublikanın hüquq-mühafizə orqanlarının birgə keçirdiyi antiterror əməliyyatı nəticəsində məhv edilib”, – bəyanatda deyilir.
Bildirilib ki, insident Dağlıq Bədəxşan muxtar vilayətinin Vanc rayonunda baş verib.
Komitənin məlumatına görə, hadisə yerindən iki Kalaşnikov avtomatı, iki tapança, səkkiz əl qumbarası, 12 qutu patron, içərisində partlayıcı olan 19 paket, həmçinin iki xüsusi rabitə vasitəsi və iki mobil telefon tapılıb.
Faktla bağlı cinayət işi başlanılıb. Hazırda terrorçuların şəxsiyyəti müəyyənləşdirilir.
Polis və mülki şəxslər arasında itkilər barədə məlumat verilmir.
Mənbə: TASS