Hakim “Gürcü Arzusu-Demokratik Gürcüstan” partiyasının təsisçisi və fəxri sədri Bidzina İvanişvili jurnalistlərə müsahibəsində fəal siyasətə qayıtdığını bir daha bəyan edib.
Bugun.tv xəbər verir ki, B.İvanişvili jurnalistlərə ilk müsahibəsində bəzi məsələlərə də aydınlıq gətirib.
Partiyanın fəxri sədri bildirib ki, onun siyasətə qayıdışı ilə əlaqədar Gürcüstan hökumətinin tərkibində və partiya daxilində dəyişiklik olmayacaq.
B.İvanişvili deyib: “Mən Baş nazir vəzifəsi üçün namizəd olmayacağam. Baş nazir dəyişməyəcək. Nazirlər də öz postlarında qalacaqlar”.
Onun sözlərinə görə, “Gürcü arzusu” bu gün 60 faizə qədər real reytinqə malikdir və partiya 2024-cü il seçkilərində qalib gələcək.
“Gürcü arzusu” 2024-cü il seçkilərində mütləq qalib gələcək. Biz 2012-ci ildən bəri izlədiyimiz xətti gedəcəyik, ölkəmizi 2030-cu ilədək Avropa İttifaqına üzv edəcəyik, insan haqlarını mümkün qədər yaxşılaşdıracağıq”, – deyə İvanişvili vurğulayıb.