Bugun.Tv xəbər verir ki, dünyanın ən böyük kriptovalyuta birjalarından biri olan Binance-də təxminən 6,3 milyard dollar həcmində aktivə təsir edən ciddi təhlükəsizlik insidenti baş verib. Hadisə kriptovalyuta bazarında indiyədək qeydə alınan ən böyük hücumlardan biri kimi qiymətləndirilir.
“Reuters” agentliyinin məlumatına görə, Binance və onun tərəfdaşları hadisə ilə əlaqəli aktivlərin təxminən 3 milyard dollar dəyərində olan hissəsini müəyyənləşdirərək dondurmağa nail olublar. Qalan 3,3 milyard dolların hazırkı vəziyyəti barədə isə hələlik dəqiq məlumat verilməyib.
Şirkətin həmtəsisçisi Yi He hücum nəticəsində yaranan bütün itkilərin Binance tərəfindən qarşılanacağını bildirib. Birja isə istifadəçilərin vəsaitlərinin təhlükəsiz olduğunu açıqlayıb.
Hücumun səbəbi nə ola bilər?
Binance-in ilkin araşdırmasına əsasən, insident şirkətin DevOps mühəndislərindən birinə məxsus noutbukun ələ keçirilməsi ilə əlaqəli ola bilər. Ehtimal edilir ki, hücum edən şəxs bu yolla daxili sistemlərdən birinə giriş əldə edərək icazəsiz pulköçürmə əməliyyatları həyata keçirib.
Şirkət araşdırma zamanı kriptovalyuta cüzdanlarının məxfi açarlarının ələ keçirilməsinə dair sübut aşkarlanmadığını bildirib. Bununla belə, hadisənin bütün detalları hələ tam müəyyənləşdirilməyib.
“Associated Press” agentliyinin yaydığı məlumata görə, Binance təhlükəsizlik yoxlamaları və araşdırma aparıldığı müddətdə depozit və pulçıxarma əməliyyatlarını müvəqqəti dayandırıb. Şirkət əlavə məlumatların yalnız faktlar tam dəqiqləşdirildikdən sonra açıqlanacağını bildirib.
Kriptovalyuta bazarında narahatlıq artır
Təhlükəsizlik insidenti kriptovalyuta bazarında da ciddi narahatlıq yaradıb. Xəbərin yayılmasından sonra bitkoin və efiriumun qiymətlərində eniş qeydə alınıb. Ekspertlər belə hadisələrin mərkəzləşdirilmiş kriptovalyuta birjalarına olan etimada mənfi təsir göstərə biləcəyini bildirirlər.
Hazırda Binance və tərəfdaş şirkətlər hadisə ilə əlaqəli aktivlərin izlənilməsi və mümkün qədər çox vəsaitin dondurulması istiqamətində işlərini davam etdirirlər. Hücumun yekun maliyyə nəticələri və aktivlərin nə qədərinin geri qaytarılacağı araşdırmanın tamamlanmasından sonra aydınlaşacaq.
Mənbə: Reuters