BMT Baş Assambleyasının prezidenti Abdulla Şəhid bu həftənin sonunda Azərbaycana səfər etməyi planlaşdırır. Bugün.tv bildirir ki, bunu BMT Baş Assambleyasının sözçüsü Paulina Kubiak bildirib.
Respublikaya işgüzar səfər iyunun 12-13-də baş tutacaq. Onun çərçivəsində Azərbaycan rəsmiləri, o cümlədən xarici işlər naziri Ceyhun Bayramov ilə bir sıra görüşlər nəzərdə tutulub.
Bundan əvvəl BMT Baş Assambleyasının prezidenti Nyu-Yorkda Azərbaycan Dövlət Miqrasiya Xidmətinin rəisi Vüsal Hüseynovla görüşüb. Söhbət Beynəlxalq Miqrasiya İcmalı Forumu çərçivəsində baş tutub.
Görüşdə Şəhid son illər Azərbaycanda miqrasiya proseslərinin idarə olunması və Miqrasiya üzrə Qlobal Sazişin icrası istiqamətində görülən işləri yüksək qiymətləndirib. Tərəflər qeyd ediblər ki, Azərbaycan torpaqlarının işğalına son qoyulması regionda sülhü təmin etməklə yanaşı, bütün sahələrdə, o cümlədən miqrasiya sahəsində yeni reallıqlar və imkanlar yaradıb.
Xatırladaq ki, Azərbaycan BMT-nin Dayanıqlı İnkişaf Məqsədləri İndeksi üzrə 100 mümkün baldan 73,5 bal toplayaraq və illik müqayisədə beş pillə irəliləyərək regionda lider mövqe tutub.