Bugun.tv xəbər verir ki, 75,85 dollara kimi bahalaşan Brent markalı neftin barel qiyməti günü 74,17 dollarla bağladı.
Eyni dəqiqələrdə Qərbi Texas tipli (WTI) xam neftin bir bareli 69,92 dollardan alıcı tapıb.
Dünyanın ən böyük neft istehlakçıları olan ABŞ və Çinin tələb proqnozu ilə bağlı mənfi gözləntilər qiymətlərin məhdud enişində təsirli olub.
Qiymətlər, ABŞ-ın defolt riski fonunda tənəzzülə girə biləcəyi ilə bağlı narahatlıqlar səbəbindən keçən həftə ardıcıl dördüncü həftədir ucuzlaşıb.
Beynəlxalq Valyuta Fondunun (BVF) sözçüsü Julie Kozack keçən həftə xəbərdarlıq etmişdi ki, ABŞ defolt edərsə, bunun təkcə ABŞ üçün deyil, həm də dünya iqtisadiyyatı üçün ciddi fəsadları olacaq.
Çindən gələn zəif iqtisadi məlumatlar da tələb narahatlıqlarını dəstəkləyən başqa bir amil oldu. İnvestorlar neft tələbinin bərpası əlamətləri üçün yaxın həftələrdə Çinin sənaye istehsalı, əsas kapitala investisiya və pərakəndə satışlar üzrə iqtisadi məlumatlarını yaxından izləyəcəklər.
Təchizat tərəfində isə Neft İxrac Edən Ölkələr Təşkilatı (OPEC) və bəzi qeyri-OPEC istehsalçı ölkələrindən ibarət OPEC+ qrupuna üzv ölkələrin toplantısı yaxından izləniləcək.
Qrupun aprelin əvvəlində gündəlik 1,2 milyon barel azaltmaq qərarı ilin ikinci yarısında tədarükdə daralma olacağına dair narahatlıqları artırır və qiymətlərin aşağıya doğru hərəkətini məhdudlaşdırır.
Beynəlxalq KİV-in məlumatına görə, qrupun növbəti iclasda qiymətləri dəstəkləmək üçün əlavə endirimlər edə biləcəyi ilə bağlı proqnozlara baxmayaraq, İraqın neft naziri Hayyan Əbdülqəni OPEC+ qrupunun iyunun 4-də keçiriləcək növbəti iclasında neft hasilatını daha da azaltacağını gözləmədiyini bildirib.
G7 ölkələri liderlərinin mayın 19-21-də keçirəcəkləri görüşlərdə Rusiyanın enerji ixracı və ticarətinə qarşı sanksiyaları sərtləşdirməyi planlaşdırdıqları xəbər axını təchizat tərəfində izləniləcək başqa bir inkişaf olacaq.
Bildirilir ki, texniki olaraq Brent markalı neftin 74,31-74,51 dollar diapazonunu müqavimət, 73,72-73,33 dollar diapazonu isə dəstək zonası kimi izləyə bilər.
Mənbə: TRThaber