Böyük Britaniya hökuməti İsrailin Qərb Şəriyəsində həyata keçirməyi planlaşdırdığı E1 yaşayış məntəqəsi layihəsi ilə bağlı addım atmağa çağırılıb. Bu barədə The Guardian yazır.
Məlumata görə, 32 keçmiş səfir və yüksək komissar Britaniya hökumətinə məktub ünvanlayaraq, 3400 evdən ibarət planlaşdırılan layihəyə qarşı sərt tədbirlər görülməsini tələb ediblər. Onlar bu layihəni Qərb Şəriyəni bölən və iki dövlətli həll perspektivini zəiflədən addım kimi qiymətləndiriblər.
Diplomatlar bildiriblər ki, İsrailin E1 planı beynəlxalq hüquq baxımından ciddi mübahisələr doğurur və bölgədə gərginliyi artıra bilər. Onların çağırışına görə, layihədə iştirak edən şirkətlərə qarşı sanksiyalar tətbiq olunmalı və ticarət məhdudiyyətləri gündəmə gətirilməlidir.
Məktubda həmçinin vurğulanır ki, Böyük Britaniya İsraillə ticarət münasibətlərində insan haqları müddəalarını əsas götürərək daha sərt mövqe sərgiləməlidir. Eyni zamanda Avropa ölkələrinin də vahid yanaşma nümayiş etdirməsi istənilir.
Bəzi Avropa liderləri də layihəyə münasibət bildirib. Almaniya kansleri Friedrich Merz planı “səhv addım” kimi qiymətləndirib və bunun ilhaq xarakterli ola biləcəyini qeyd edib.
Böyük Britaniyanın baş naziri Keir Starmer isə daha əvvəl parlamentdə çıxışı zamanı bildirib ki, İsrail yaşayış məntəqələri beynəlxalq hüququn pozulması kimi qiymətləndirilir və iki dövlətli həll üçün təhlükə yaradır.
E1 layihəsi illərdir beynəlxalq ictimaiyyət tərəfindən mübahisəli hesab olunur. Planın həyata keçməsi Qüds və Qərb Şəriyəsi arasındakı coğrafi əlaqəni daha da parçalaya bilər.
Mənbə: The Guardian